ထက်ခေါင်လင်း/Myanmar Now - ဆင်းရဲချမ်းသာကွာဟမြှု
(Myanmar NOW) မိုးမခ၊ နိုဝင်ဘာ ၈၊ ၂၀၁၅
(Myanmar NOW) မိုးမခ၊ နိုဝင်ဘာ ၈၊ ၂၀၁၅
ရန်ကုန် (Myanmar Now) - အလင်းရောင်သိပ်မရှိတဲ့ အခန်းထဲက ခုံတစ်လုံးမှာ ထိုင်ရင်း စာရွက်စာတမ်းတွေဖတ်၊ ခုံဘေးမှာလည်း မဲဆွယ် လက်ကမ်းစာစောင်ထုပ်တွေဝန်းရံနေတဲ့ ဒီမိုကရက်တစ်ပါတီ(မြန်မာ)ရဲ့ အသက် ၈၃ နှစ်အရွယ် ဥက္ကဋ္ဌ ဦးသုဝေက နဖူးက ချွေးတချို့ကို သုတ်လိုက်ပါတယ်။
ရွေးကောက်ပွဲမှာ ဝင်ရောက် ယှဉ်ပြိုင်ဖို့ သူတို့ပါတီက ကိုယ်စားလှယ်လောင်း ၄၉ ဦး ရှိပေမယ့် မဲဆွယ်စရိတ် မစီစဉ်ပေးနိုင်တဲ့အတွက် စိတ်မကောင်းဘူးလို့ သူက ဆိုပါတယ်။
“ကိုယ့်လူတွေကို လက်ကမ်းစာစောင်လေးလောက်ပဲ လုပ်ပေးနိုင်တာ။ ကိုယ်စားလှယ်လောင်းစရိတ်ကအစ အောင်နိုင်ရေးအသုံးစရိတ် အားလုံးကို သူတို့ဘာသာ သူတို့ စိုက်သုံးရမှာ” လို့ ဦးသုဝေက ရှင်းပြပါတယ်။
ရွေးကောက်ပွဲဝင် ပါတီ ၉ဝ ကျော်မှာ ငွေလှိုင်လှိုင်သုံးနိုင်တဲ့ပါတီက ၂ ခုထက် ပိုပုံ မရပါဘူး။ ပါတီခေါင်းဆောင်များကို ဆက်သွယ်မေးမြန်းရာမှာ ဘဏ္ဍာရေးအခက်အခဲရှိတဲ့ကြားကနေ လှုပ်ရှားရုန်းကန်နေကြရတယ်လို့ ပြောကြပါတယ်။
သူဌေးပါတီနဲ့ ဆင်းရဲသားပါတီ
စီးပွားရေးခေတ်နောက်ကျနေတဲ့ တိုင်းရင်းသားလူမျိုးစုတွေကို အခြေခံထားတဲ့ တိုင်းရင်းသားပါတီတွေက ဘဏ္ဍာရေး ပိုမို အခက်အခဲ ဖြစ်လိမ့်မယ်လို့ ကျားဖြူပါတီ ခေါ် ရှမ်းတိုင်းရင်းသားများ ဒီမိုကရက်တစ်ပါတီ အတွင်းရေးမှူး ဦးစိုင်းလှကျော်က ယူဆပါတယ်။
“ကျွန်တော်တို့တိုင်းရင်းသားတွေက ခရိုနီတို့ဘာတို့နဲ့ နီးစပ်တာမျိုးမရှိဘူးလေ။ နီးစပ်မှ အထောက်အကူရတာ” လို့ ဦးစိုင်းလှကျော်က ဆိုပါတယ်။
ပါတီတချို့ဟာ သူပုန်တွေဆီက ငွေကြေး အထောက်အပံ့ရနေတယ် ဆိုတဲ့ ပြောဆိုချက်မျိုးကိုတော့ သူက ငြင်းပယ်ခဲ့ပါတယ်။ တိုင်းရင်းသားလက်နက်ကိုင် အဖွဲ့တော်တော် များများဟာ ပြည်သူတွေဆီက ဆက်ကြေးတောင်းပြီး ရပ်တည်နေကြတယ်၊ ရွေးကောက်ပွဲ ဥပဒေအရလည်း အဲဒီလိုငွေမျိုး လက်ခံခွင့်မရှိ၊ သူပုန်အဖွဲ့တွေဆီက ရတာဆိုလို့ စိတ်ဓာတ်ရေးရာ အကူညီတွေပဲ ဖြစ်မယ်လို့ သူကဆိုပါတယ်။
မြန်မာပြည်ရဲ့ အချမ်းသာဆုံးပါတီဖြစ်တဲ့ အာဏာရ ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ (ပြည်ခိုင်ဖြိုး)ရဲ့ အမတ်လောင်း အရေအတွက် တစ်ထောင်ကျော် ရှိပြီး သူတို့ကို ကျပ်သိန်း ၃ဝ စီ ထောက်ပံ့ပေးတယ်လို့ ပါတီရဲ့သင်္ဃန်းကျွန်းမြို့နယ် အတွင်းရေးမှူး ဦးအောင်မြတ်ဇော်က ပြောပြတယ်။ ဒီပမာဏဟာ ပါတီဌာနချုပ် ဘဏ္ဍာရေးဌာန ဒုဌာနမှူး ဒေါ်ဌေးဌေးနွယ် ရန်ကုန်အခြေစိုက် သံတော်ဆင့်ဂျာနယ်ကို မဲဆွယ်ကာလမတိုင်ခင် ပြောပြချက်နဲ့ တူတူပါပဲ။
ပြည်ခိုင်ဖြိုးပါတီဟာ အမတ်လောင်းအားလုံးအတွက် ကျပ် သန်းသုံးထောင်ထက်မနည်း သုံးပေမယ့် မြို့နယ်ပါတီဌာနခွဲတွေအတွက် ဘယ်လောက် သုံးစွဲတယ် ဆိုတာကိုတော့ မသိရသေးပါဘူး။
မဲဆွယ်ရာမှာ အမတ်လောင်းတစ်ဦးကို ကျပ်သိန်း ၁ဝဝ အထိပဲ သုံးနိုင်တယ် ဆိုတဲ့ ရွေးကောက်ပွဲ ကော်မရှင်ရဲ့ ခွင့်ပြုချက်အတိုင်း အပြည့်အဝ သုံးစွဲသွားမယ်ဆိုရင်တော့ ပြည်ခိုင်ဖြိုးပါတီရဲ့ ရွေးကောက်ပွဲအသုံးစရိတ်ဟာ ကျပ်သန်းပေါင်း တစ်သောင်း ကျော်ပါလိမ့်မယ်။
ပြည်ခိုင်ဖြိုးလိုပဲ အမျိုးသားဒီမိုကရေစီအဖွဲ့ချုပ် (NLD) အမတ်လောင်း အရေအတွက်ကလည်း တစ်ထောင်ကျော်ပါတယ်။ သင်္ဃန်းကျွန်းမြို့နယ်က NLD ရဲ့ အမတ်လောင်းတစ်ယောက်ဖြစ်တဲ့ ဦးရွှေလှဝင်းက သူတို့မြို့နယ်မှာ အမတ်လောင်းတွေ တစ်ယောက် ဆယ်သိန်းစီ ထည့်ဝင်ကြတယ်၊ မြို့နယ်ပါတီရုံးခွဲကလည်း ငွေသိန်းနှစ်ဆယ်ကျော် အလှူခံ ရရှိထားတယ်လို့ ပြောပြပါတယ်။ ရန်ပုံငွေကို ပါတီဌာနချုပ်က မထောက်ပံ့နိုင်ဘူးလို့ ဆိုပါတယ်။
မကြာသေးခင် လပိုင်းအတွင်း ပေါ်ပေါက်လာတဲ့ အမျိုးသားတိုးတက်ရေးပါတီက ဒီနှစ်ရွေးကောက်ပွဲမှာ အမတ်လောင်းအရေအတွက် တတိယအများဆုံးပါတီ ဖြစ်ပါတယ်။ သမ္မတဦးသိန်းစိန်ရဲ့အကြံပေးအရာရှိဟောင်း ဒေါက်တာနေဇင်လတ် ထူထောင်ထားတဲ့ ဒီပါတီကို နိုင်ငံရေးလေ့လာသူတွေ စိတ်ဝင်တစား စောင့်ကြည့်ကြပါတယ်။ ဒီပါတီကြီးရဲ့ ကုန်ကျစရိတ်အတွက် ငွေကြေးထောက်ပံ့မှုတွေက ဘယ်က လာပါသလဲ။ မဲဆွယ်ကုန်ကျစရိတ်တွေ ဘယ်က ရပါသလဲ။ ဒေါက်တာနေဇင်လတ်ကတော့ အမတ်လောင်းတွေ အိတ်စိုက်သုံးကြတယ်လို့ ဆိုပါတယ်။
"ကျွန်တော်တို့ကိုယ်စားလှယ်လောင်းတွေကလည်း ကိုယ်ပိုင်စီးပွားရေးလုပ်ငန်းတွေ လုပ်ကြတဲ့သူတွေဆိုတော့ သူတို့ငွေကို သူတို့သုံးနိုင်ကြတာကြောင့် ပါတီဗဟိုကနေ ထောက်ပံ့ပေးတာမျိုး မရှိပါဘူး”လို့ ဒေါက်တာနေဇင်လတ်က ပြောပါတယ်။
ပြည်ပအဖွဲ့တွေ ကူညီကြသလား
အလယ်အလတ်စားပါတီတွေထဲမှာ ထင်ရှားတဲ့ အမျိုးသားဒီမိုကရေစီ အင်အားစု (NDF) ကလည်း ဘဏ္ဍာရေး အခက်အခဲ ရှိတယ် ဆိုတဲ့ ပါတီများထဲမှာ ပါပါတယ်။ ၂ဝ၁ဝ ရွေးကောက်ပွဲကာလတုန်းကတော့ NDF ခေါင်းဆောင်တွေကြား လူသိရှင်ကြား အငြင်းပွားမှု ဖြစ်ပေါ်ရာကနေ သူတို့ပါတီဟာ တခြားအဖွဲ့အစည်းတစ်ခုကနေ ထောက်ပံ့ငွေ ရယူတယ် ဆိုတဲ့အချက် ပေါ်ပေါက်လာပါတယ်။ ထောက်ပံ့ငွေ ပမာဏကိုတော့ မသိရပါဘူး။
အဲဒီလိုပဲ အခုချိန်မှာလည်း အစိုးရနဲ့ နီးစပ်တဲ့အသိုင်းအဝိုင်း၊ စီးပွားရေးလုပ်ငန်းရှင်တချို့က ငွေကြေးထောက်ပံ့ပေးနေတဲ့အသံတွေလည်း ထွက်ပေါ်လာပါတယ်။
နေပြည်တော်အစိုးရပိုင်းနဲ့ ထိတွေ့မှုရှိတဲ့ ပြည်ပရောက် လုပ်ငန်းရှင်တစ်ဦးရဲ့ ငွေကြေးထောက်ပံ့လိုကြောင်း ကမ်းလှမ်းမှုမျိုးကိုလည်း ရရှိခဲ့ဖူးတယ်လို့ ကျားဖြူပါတီမှ ဦးစိုင်းလှကျော်က ပြောပြတယ်။
ပြည်ထောင်စု ဒီမိုကရေစီပါတီ ဥက္ကဋ္ဌ ဦးသောင်းဝင်းက အဖွဲ့အစည်းတချို့ကလည်း ပါတီတချို့ကို နောက်ကွယ်က ထောက်ပံ့မှုတွေ ပြုလုပ် ပေးနေတဲ့အသံတွေကို ကြားမိတယ်၊ သူတို့က လစဉ်လိုလို ပုံမှန် ပါတီဝင်တချို့နဲ့ အစည်းအဝေး၊ တွေ့ဆုံပွဲတွေ ပြုလုပ် လေ့ရှိပြီးတော့ အဲဒီလူတွေကနေ တဆင့် ငွေကြေးစီးဆင်းမှုတွေ ရှိနေတယ်လို့ ပြောပါတယ်။
“ဘယ်အဖွဲ့အစည်းဆိုတာတော့ ကျွန်တော်မပြောလိုဘူး။ ဒါပေမယ့် လက်ရှိ အစိုးရနဲ့ အနီးစပ်ဆုံးဖြစ်ပြီး အစိုးရကိစ္စတွေကို အ ကောင်အ ထည်ဖော်နေတဲ့အဖွဲ့ပဲ” လို့ ဦးသောင်းဝင်းက ဆိုပါတယ်။
ဦးသောင်းဝင်းက ပါတီရန်ပုံငွေလိုတဲ့အတွက် အဲဒီအဖွဲ့ကို လျှောက်လွှာတင်မယ်၊ အဆင်ပြေရင် ဒီအဖွဲ့နဲ့ ပုံမှန် ထိတွေ့နေသူတွေဆီက တစ်ဆင့် ထောက်ပံ့မှု စီးဆင်းလာမယ်လို့ ဆိုပါတယ်။
ဒေါက်တာနေဇင်လတ်ကတော့ သူတို့ပါတီဟာ အစိုးရနဲ့ နီးစပ်တဲ့ အဖွဲ့အစည်းတွေကို ပါတီတည်ထောင်စဉ်ကတည်းက ကူးလူးဆက်ဆံမှုမရှိဘူးလို့ ပြောပါတယ်။
“ကျွန်တော် သမ္မတ အကြံပေးဘဝတုန်းကလည်း အခု ပါတီတွေကို ထောက်ပံ့ပေးနေတဲ့ အဖွဲ့အစည်းတွေလို့ အသံထွက်တဲ့ ဟာတွေနဲ့ မနီးစပ်ခဲ့သလို ပါတီထောင်တဲ့အခါ ပိုလို့တောင် အလှမ်းဝေးပါတယ်ဗျာ” လို့ သူက ဆိုပါတယ်။“
ငွေကြေးထောက်ပံ့ပေးကြတဲ့ အဖွဲ့အစည်းတွေရဲ့ ရည်ရွယ်ချက်က လက်ရှိမြန်မာ့နိုင်ငံရေးမှာ အင်အားကြီး ပြည်ခိုင်ဖြိုးနဲ့ အတိုက်အခံ NLD တို့အပြင် တတိယအင်အားစုများ ပေါ်ထွန်းလာစေရေး ဖြစ်တယ်လို့ ထောက်ပံ့မှု ကမ်းလှမ်းခံရဖူးသူ ကျားဖြူပါတီမှ ဦးစိုင်းလှကျော်က ပြောပါတယ်။
ရုံးခန်းငှားခ ခေါင်းကိုက်နေရ
သင်္ဃန်းကျွန်းမြို့နယ်က NLD အမတ်လောင်း ဦးရွှေလှဝင်းက မဲဆွယ်ကာလမှာ အခမဲ့ လိုက်လံကူညီပေးမယ့် ကားပိုင်ရှင်တွေ ရှိပေမယ့် အဲဒီကားတွေအတွက် ကုန်ကျစရိတ်ဆိုပြီး စာရင်းပြုစု ရေးသွင်းထားတယ်လို့ သူကဆက်ပြောတယ်။ NLD ရဲ့ မဲဆွယ်လှုပ်ရှားမှုကို အာဏာပိုင်တွေက အချိန်ပြည့် စောင့်ကြည့်နေတဲ့အတွက် ဂရုစိုက်ရမယ်လို့ သူက ရှင်းပြပါတယ်။
“(အာဏာပိုင်တွေ စုံစမ်းထားတဲ့စာရင်းနဲ့) ကွာဟခဲ့မယ်ဆိုရင် ကျွန်တော်တို့ အနိုင်ရတဲ့အခါ အဲဒီအချက်နဲ့ ကျွန်တော်တို့ကို ဖြတ်ချနိုင်တယ်” လို့ သူက ဆိုပါတယ်။
ပါတီအများစုဟာ အိမ်ခြံမြေဈေးနှုန်း မြင့်မားတဲ့ရန်ကုန်မှာ အခြေစိုက်တာကြောင့် ပါတီတွေရဲ့ ဘဏ္ဍာရေးဆိုင်ရာ အခက်အခဲတွေထဲမှာ ပါတီရုံးချုပ်ဖွင့်လှစ်ရေးအတွက် ခေါင်းကိုက်ရတဲ့အချက်လည်း ပါပါတယ်။ ရုံးခွဲတွေကိုတော့ ပါတီဝင်တွေရဲ့အိမ်တွေမှာပဲ ဖွင့်ကြပါတယ်။
ရန်ကုန်တိုက်ခန်းကျဉ်းတွေကိုပဲ ဈေးကြီးကြီးပေးငှားပြီး ပါတီဌာနချုပ် ဖွင့်သူတွေထဲမှာ ဒီမိုကရက်တစ်ပါတီ(မြန်မာပြည်) လည်း ပါဝင်ပါတယ်။ အခန်းငှားခ မတတ်နိုင်တာကြောင့် ၂ဝ၁ဝ ပြည့်နှစ် ပါတီတည်ထောင်စဉ်ကစပြီး ဒီနေ့အထိ ဌာနချုပ်ရုံး ပြောင်းရွှေ့ရတဲ့အကြိမ်ပေါင်း ၅ ကြိမ် ရှိပြီလို့ ပါတီဥက္ကဋ္ဌ ဦးသုဝေက ရှင်းပြပါတယ်။
“ဒီအခန်းက ၂ နှစ် စာချုပ်ချုပ်ထားတယ်။ ရွေးကောက်ပွဲ ပြီးတဲ့ အချိန်အထိတော့ ဒီ ကျောက်မြောင်းမှာ ကျွန်တော်တို့ ဖွင့်နိုင်ဦးမှာပေါ့။ နောက်ထပ် စာချုပ်ချုပ်တဲ့အချိန်ကြမှ ပြောင်းမလား၊ ဒီမှာပဲ ဆက်ရှိမလားတော့ မသိသေးဘူး” လို့ ဦးသုဝေက ပြောပြပါတယ်။ ။