မောင်မောင်စိုး - ၂၁ ရာစုပင်လုံနှင့် မိုင်ဂျာယာန် မျက်နှာစုံညီအစည်းအဝေး - အပိုင်း ၂

မောင်မောင်စိုး - ၂၁ ရာစုပင်လုံနှင့် မိုင်ဂျာယာန် မျက်နှာစုံညီအစည်းအဝေး - အပိုင်း ၂
(မိုးမခ) သြဂုတ် ၁၂၊ ၂၀၁၆
အစိုးရ နိုင်ငံတကာနှင့် မိုင်ဂျာယာန်ညီလာခံ
တိုင်းရင်းသားလက်နက်ကိုင်တပ်ဖွဲ့များအနေနှင့် မိုင်ဂျာယာန်ညီလာခံ အောင်မြင်စွာ ကျင်းပနိုင် ရေးအတွက် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံ တင်ပြသဘောတူညီချက် ရယူခဲ့သကဲ့သို့ ကာကွယ်ရေးဦးစီးချုပ်အားလည်း ညီလာခံအတွက် သွားလာရေးလုံခြုံရေးအတွက် အကူအညီရယူခဲ့သည်။

ထို့ကြောင့်လည်း ညီလာခံသို့သွားရောက်သူများအား အဆင်ပြေစွာသွားလာနိုင်ခဲ့သည်။ ညီလာခံတက်ရောက်သူများသွားရောက်ကြသော မူစယ်မှ တရုတ်ပြည်ရွှေလီကိုဖြတ်၍ မိုင်ဂျာယာန်သို့သွားလာရာတွင်၎င်း မြစ်ကြီးနားမှ စိန်လုံကဘာ လွယ်ဂျယ်လမ်းမှ မိုင်ဂျာယာန်သို့ သွားရောက်ရာတွင်၎င်း တိကျသောစစ်ဆေးမှုများရှိသည့်မှအပ အဆင်ပြေစွာသွားလာနိုင်ခဲ့သည်။

တကယ်တမ်းအားဖြင့်ဆိုလျှင် မိုင်ဂျာယာန်သည် မြန်မာစစ်ဖက်မှစစ်မြေပြင်တပ်ရင်းတရင်း အခြေပြုထားသည့် လွယ်ဂျယ်မှ ကားဖြင့်သွားလျှင် ၁၀ မိနစ်ခန့်သာဝေးကွာပါသည်။ လွယ်ဂျယ်အပေါ်ရှိ မြန်မာစစ်ဖက်မှအခြေပြုထားရာ ယောယုံတောင်ကုန်းများမှလည်း အမြောက် တကမ်းစာအကွာတွင်သာ ရှိသည်။ သို့သော် အားလုံး၏နားလည်မှုရှိမှုကြောင့် မိုင်ဂျာယာန် ညီလာခံသည် အေးချမ်းစွာပြီးဆုံးခဲ့သည်။ လိုင်ဇာညီလာခံတွင် သမ္မတဦးသိန်းစိန် သဝဏ်လွှာ ပို့သကဲ့သို့ မိုင်ဂျာယာန်ညီလာခံတွင် အရပ်သားအစိုးရ၏သဝဏ်လွှာရောက်ရှိမလာသော်လည်း မိုင်ဂျာယာန်ညီလာခံမှ ရလဒ်ကောင်းများအား မျှော်လင့်ကြောင်း ဒေါ်အောင်ဆန်းစုကြည်က ဆိုခဲ့ပါသည်။

သဝဏ်လွှာမပို့ခဲ့သော်လည်း ၂၀၁၆ ဇူလိုင် ၂၃ ရက်တွင် ပြည်ထောင်စုငြိမ်းချမ်းရေးကော်မရှင်မှ ကြေညာချက်တခု ထုတ်ပြန်ခဲ့သည်။ ၎င်းကြေညာချက်တွင် မိုင်ဂျာယာန်ညီလာခံတွင်ပါဝင်သူများ သွားလာရေးအဆင်ပြေစေရန် လိုအပ်သည့်အုပ်ချုပ်ထောက်ပံ့မှုများကို ကူညီဆောင်ရွက်လျက ရှိကြောင်း၊ ငြိမ်းချမ်းရေးကော်မရှင်အနေနှင့် ၂၁ ရာစုပင်လုံညီလာခံအတွက် အကြိုပြင်ဆင်ရေး လုပ်ငန်းများ လုပ်ဆောင်လျက်ရှိကြောင်း၊ ၂၁ ရာစုပင်လုံညီလာခံတွင် ပါဝင်သင့် ပါဝင်ထိုက်သူ အားလုံးပါဝင်ရေးအတွက် အကြိုပြင်ဆင်ရေးလုပ်ငန်းများတွင် NCA လက်မှတ်ထိုးထားသည့် အဖွဲ့များရော မထိုးသေးသည့်အဖွဲ့များရောဖိတ်ကြားထားကြောင်း၊ တနိုင်ငံလုံး အပစ်အခတ် ရပ်စဲရေးသဘောတူညီချက် NCA တွင် အဓိပ္ပာယ်ဖွင့်ဆိုရန်လိုအပ်သည့်အချက်များကိုလည်း ဆွေးနွေးညှိနှိုင်းလျက်ရှိကြောင်း၊ မိုင်ဂျာယာန်ညီလာခံ၌ ၂၁ ရာစုပင်လုံညီလာခံအကြို ပြင်ဆင်ရေး လုပ်ငန်းများတွင် NCA လက်မှတ်ရေးထိုးခြင်းမရှိသေးသော အဖွဲ့များပါဝင်ရေးကို အောင်မြင်စွာ ဆွေးနွေးပြီး NCA ပေါ်အခြေခံ၍ ပေါ်လာသည့် ၂၁ ရာစုပင်လုံသို့ တိုင်းရင်းသားလက်နက်ကိုင်တပ်
ဖွဲ့များ စုံညီစွာတက်ရောက်နိုင်ရန် မျှော်လင့်ကြောင်းထုတ်ပြန်ကြေညာခဲ့သည်။

မိုင်ဂျာယာန်ညီလာခံကျင်းပနေစဉ် ၎င်းဒေသတွင် စစ်ရေးတိုက်ပွဲများ ဖြစ်ပွားခြင်းမရှိသော်လည်း ကျင်းပနေစဉ်နှင့် ကျင်းပပြီးကာလများ၌ KIA ထိန်းချုပ်ရာဒေသများတွင် တိုက်ပွဲများ ဖြစ်ပွားသည် ကို တွေ့ရသကဲ့သို့ SSPP/ SSA ထိန်းချုပ်ရာ ဝမ်းဟိုင်းဒေသတွင် SSA တပ်ရင်းတရင်းအား နေရာဖယ်ပေးရန်တောင်းဆိုခြင်းများဖြစ်ပွားသည်ကို တွေ့ရသည်။ သို့ဖြစ်ရာ ညီလာခံအား ထိခိုက်မှုမရှိသော်လည်း ဖြေရှင်းရမည့် ကိစ္စများစွာရှိသေးသည်ကို အချက်ပေးခေါင်းလောင်း ထိုးနေသည်ဟုဆိုရပါမည်။

နိုင်ငံတကာတာဝန်ရှိသူများအနေနှင့် မိုင်ဂျာယာန်ညီလာခံသို့ သံတမန်များ စေလွှတ်ခြင်းဖြင့် ပြည်တွင်းငြိမ်းချမ်းရေး တိုင်းရင်းသားအရေးကို အလေးထားကြောင်းဖော်ပြခဲ့သည်။ ကမ္ဘာ့ကုလသမဂ္ဂ အထွေထွေအတွင်းရေးမှူးချုပ်၏အထူးကိုယ်စားလှယ် မစ္စတာဗီဂျေနမ်ဗီးယား နှင့်အဖွဲ့၊ တရုတ်ပြည်အာရှရေးရာအထူးသံတမန် မစ္စတာဆွန်ကော့ရှန်နှင့်အဖွဲ့တို့လည်း တက်ရောက်ခဲ့ပြီး မြန်မာပြည် ပြည်တွင်းငြိမ်းချမ်းရေးနှင့် ပတ်သက်၍၎င်း၊ တိုင်းရင်းသားများနှင့် ပတ်သက်၍၎င်း၊ ၎င်းတို့၏အလေးထားမှုကိုဖော်ပြခဲ့သည်။

မူလစီစဉ်ထားသည့် အစည်းအဝေးနောက်ဆုံးရက်အဖြစ်သတ်မှတ်ထားသည့် ၂၀၁၆ ဇူလိုင်လ ၂၉ ရက်တွင် သတ်မှတ်ထားသည့်အစီအစဉ်အတိုင်း ၎င်းသံတမန် ၂ ဦးစလုံးမှ နှုတ်ခွန်းဆက်စကား ပြောကြားခဲ့သည်။ ၎င်းတို့ ၂ ဦးစလုံးက မြန်မာပြည် ပြည်တွင်းငြိမ်းချမ်းရေးအတွက် ကြိုးပမ်းအား ထုတ်မှုများကို ကြိုဆိုကြောင်း၊ မျှော်လင့်ချက်ထားရှိကြောင်းနှင့် အားပေးထောက်ခံကြောင်း ပြောဆိုခဲ့သကဲ့သို့ ယခုညီလာခံတွင် ပို၍ကျယ်ကျယ်ပြန့်ပြန့်ပါဝင်လာသည်ကိုတွေ့ရ၍ ဝမ်းမြောက် ကြောင်းစကားဆိုခဲ့သည်။ တရုတ်သံတမန် မစ္စတာဆွန်ကော့ရှန်က ငြိမ်းချမ်းရေးဖြစ်စဉ်အတွက် လွယ်ကူရာမှ စတင်ရန် အကြံပြုခဲ့သည်။

တက်ရောက်ကြသူများ

မိုင်ဂျာယာန်ညီလာခံတွင် တိုင်းရင်းသားလက်နက်ကိုင်အဖွဲ့ ၁၈ ဖွဲ့တက်ရောက်သည်ဟု ကြေညာပါသည်။ ၎င်း ၁၈ ဖွဲ့တွင် UNFC ကိုပါ အဖွဲ့တဖွဲ့ အနေနှင့် ထည့်သွင်းဖော်ပြပါသည်။ ၎င်းတို့မှာ …

၁။ UNFC ညီညွတ်သောတိုင်းရင်းသားများ ဖက်ဒရယ်ကောင်စီ
၂။ KIO/KIA ကချင်ပြည်လွတ်လပ်ရေးအဖွဲ့
၃။ KNU ကရင်အမျိုးသားအစည်းအရုံး
၎။ SSPP/SSA ရှမ်းပြည်တိုးတက်ရေးပါတီ
၅။ RCSS /SSA ရှမ်းပြည်ပြန်လည်ထူထောင်ရေးကောင်စီ
၆။ KNPP ကရင်နီအမျိုးသားတိုးတက်ရေးပါတီ
၇။ NMSP မွန်ပြည်သစ်ပါတီ
၈။ KNU/KNLA-PC ကရင်ငြိမ်းချမ်းရေးကောင်စီ
၉။ DKBA ကရင်အမျိုးသား ဒီမိုကရေစီအကျိုးပြုတပ်မတော်
၁၀။PNLO ပအို့ဝ်အမျိုးသားလွတ်မြောက်ရေးအဖွဲ့ချုပ်
၁၁။ CNF ချင်းအမျိုးသားတပ်ဦး
၁၂။ ULA/AA ရခိုင်ပြည်အမျိုးသားအဖွဲ့ချုပ်
၁၃။ ANC/AA ရခိုင်ပြည်အမျိုးသားကောင်စီ
၁၄။ ALP/AA ရခိုင်ပြည်လွတ်မြောက်ရေးပါတီ
၁၅။ LDU လားဟူ ဒီမိုကရက်တစ်သမဂ္ဂ
၁၆။ WNO ဝ အမျိုးသားအဖွဲ့ချုပ်
၁၇။ ABSDF ကျောင်းသားတပ်မတော်
၁၈။ NDAA အမျိုးသားဒီမိုကရေစီမဟာမိတ်တပ်မတော်(မိုင်းလား)
တို့ဖြစ်ကြပါသည်။

NDAA မိုင်းလားအဖွဲ့မှလွဲ၍ ကျန်အဖွဲ့တိုင်းမှ ကိုယ်စားလည် ၅ ဦး လေ့လာသူ ၅ ဦးတက်ရောက်ကြပြီး NDAA မှ လေ့လာသူ ၃ ဦး စေလွှတ်ခဲ့ပါသည်။ အကြောင်းကြောင်းများကြောင့် ကိုယ်စားလည်ရော လေ့လာသူပါမတက်ရောက်သော တိုင်းရင်းသားလက်နက်ကိုင်အဖွဲ့များမှာ အောက်ပါအတိုင်း ၄ ဖွဲ့ရှိသည်။

၁။ UWSP/UWSA ဝ ပြည်သွေးစည်းရေးပါတီ
၂။ MNDAA မြန်မာပြည်အမျိုးသား ဒီမိုကရေကရက်တစ်မဟာမိတ် တပ်မတော် (ကိုးကန့်အဖွဲ့)
၃။ PSLF/TNLA ပလောင်ပြည်နယ်လွတ်မြောက်ရေးတပ်ဦး
၎။ NSCN(K) နာဂအမျိုးသား ဆိုရှယ်လစ်ကောင်စီတို့ဖြစ်သည်။

ထို့ပြင် တရားဝင်ပါတီများအဖြစ်ရပ်တည်နေကြသော တိုင်းရင်းသားပါတီ တပ်ပေါင်းစု ၂ ခုဖြစ်သော UNA ညီညွတ်သောတိုင်းရင်းသားလူမျိုးများမဟာမိတ်အဖွဲ့နှင့် NBF ညီနောင်တိုင်းရင်းသားများဖက်ဒရယ်ရေးရှင်း တို့မှကိုယ်စားလည် ၅ ဦးစီ တက်ရောက်ခဲ့ကြသည်။ WLB မြန်မာနိုင်ငံအမျိုးသမီးအဖွဲ့ချုပ်မှလည်း ကိုယ်စားလည်တက်ရောက်ခဲ့သည်ကိုတွေ့ရသည်။

ထို့ပြင် ပြည်ထောင်စုအင်စတီကျူ PCG ငြိမ်းချမ်းရေးအကျိုးဆောင်အဖွဲ့အပါ အရပ်ဖက် လူ့အဖွဲ့အစည်းများ တသီးပုဂ္ဂလများကိုလည်း လေ့လာသူအဖြစ် ဖိတ်ကြားခဲ့သည်။ အဆိုပါ မိုင်ဂျာယာန်ညီလာခံတွင် ကိုယ်စားလှယ် ၉၆ ဦး လေ့လာသူ ၁၁၀ ဦး စုစုပေါင်း ၂၀၆ ဦး တက်ရောက်ခဲ့ပါ သည်။

ညီလာခံဦးဆောင်သူများ

၂၀၁၆ ဇူလိုင်လ ၂၆ ရက်မှ ၂၉ ရက်ထိ ပြုလုပ်ရန်ရည်ရွယ်ထားရှိသည့်
မိုင်ဂျာယာန်ညီလာခံကို အောက်ပါ "ဦးဆောင်ကော်မတီ"ဝင်များက ဦးစီး
ခဲ့သည်။

၁။ ဖဒို နော်စီဖိုးရာစိန် KNU
၂။ ဒူဝါအင်ဘန်လ KIO
၃။ နိုင်အောင်မင်း NMSP
၎။ စဝ်ဘောင်ခေး RCSS
၅။ စဝ်စိုင်းထူး SSPP
၆။ နိုင်ဟံသာ UNFC
၇။ ဒေါက်တာခင်မောင် ANC
၈။ ဦးအောင်မြတ် KNPP
၉။ ပူဇင်ကျုံး CNF
၁၀။ ခွန်မြင့်ထွန်း PNLO
၁၁။ ဦးသံခဲ ABSDF
၁၂။ တာ့ပလွဲ WNO တို့ဖြစ်ကြသည်။

"ကျင်းပရေးကော်မတီ"ဝင်များမှာ အောက်ပါအတိုင်းဖြစ်သည်။

၁။ ခူဦးရယ် ဥက္ကဋ္ဌ KNPP
၂။ ဖဒိုစောကွယ်ထူးဝင်း ဒုဥက္ကဋ္ဌ ၁ KNU
၃။ ဒူဝါဆွန်လွတ်ဂွမ်မော် ဒုဥက္ကဋ္ဌ ၂ KIO
၎။ စဝ်စိုင်းလ အတွင်းရေးမှူး RCSS
၅။ နိုင်ရွှေသိမ်း တွဲဖက်အတွင်းရေးမှူး NMSP
၆။ ပူခွါအုပ်လျံ အဖွဲ့ဝင် CNF
၇။ စဝ်စိုင်းထူး ။ SSPP
၈။ ဦးမင်းထွန်း ။ ANC
၉။ စောမြရာဇာလင်း ။ ALP
၁၀။ ဦးဆန်နီ ။ ABSDF

ပြင်ဆင်ရေးကော်မတီကို ဥက္ကဋ္ဌဦးလနန်(KIO) အတွင်းရေးမှူး စဝ်ဘောင်ခေး( RCSS ) တို့မှ ဦးဆောင်၍ အဖွဲ့ဝင် ၈ ဦးပါဝင်သည်။ အစည်းအဝေးအားထိန်းညှိဆောင်ရွက်သည့် "အကျိုးဆောင်အဖွဲ့"အား ညှိနှိုင်းရေးမှူး ဆရာမဂျာနန်နှင့် ဒုညှိနှိုင်းရေးမှူးယိင်းဟန်ဖ ဦးဆောင်သည့်အဖွဲ့ဝင် ၈ ဦးဖြင့်ဆောင်ရွက်ပြီး နည်းပညာအထောက်အကူပြု အဖွဲ့အား အဖွဲ့ဝင် ၆ ဦးဖြင့် ပါဝင်ဆောင်ရွက်သည်ကိုတွေ့ရသည်။

ချုပ်၍ဆိုလျှင် KIO/KIA ထိန်းချုပ်ရာနယ်မြေဖြစ်သည့် မိုင်ဂျာယာန်တွင် KIA မှ အိမ်ရှင်အဖြစ် ပြုလုပ်ခဲ့သော်လည်း ညီလာခံကျင်းပရာတွင် တိုင်းရင်းသားလက်နက်ကိုင်အဖွဲ့များ စုပေါင်း ဆောင်ရွက်ခြင်းကို ဂရုတစိုက်အလေးထားဆောင်ရွက်ခဲ့သည်ဟုဆိုရပါမည်။ ထို့ကြောင့်လည်း ညီလာခံ၏သဘာပတိများအဖြစ်လည်း တိုင်းရင်းသားလက်နက်ကိုင်အဖွဲ့များမှ ပူးပေါင်းတွဲဖက် လုပ်ဆောင်ခဲ့သည်ကို တွေ့ရသည်။

26/7/2016
သဘာပတိ ဒူဝါအင်ဘန်လ(KIO ဒုဥက္ကဌ)
တွဲဖက်သဘာပတိ ၁ စဝ်ဘောင်ခေး(ဒုစစ်ဦးစီချုပ် RCSS)
။ ၂ နိုင်အောင်မင်း( အထွေထွေအတွင်းရေးမှူး NMSP)

27/7/2016
သဘာပတိ ဖဒိုနော်စီဖိုးရာစိန်( KNU ဒုဥက္ကဌ)
တွဲဖက်သဘာပတိ ၁ ဦးသံခဲ ( ဥက္ကဋ္ဌ ABSDF)
။ ၂ ဦးဇိုဇမ် (ဦးဆောင်ကော်မတီဝင် NBF)

28/7/2016
သဘာပတိ ဒေါက်တာဆလိုင်လျန်မှုန်းဆာခေါင်(ဒုဥက္ကဋ္ဌ CNF)
တွဲဖက်သဘာပတိ ၁ ဒေါက်တာခင်မောင်( ဥက္ကဋ္ဌ ANC)
။ ၂ မန်းကျော်ငြိမ်း ( အဖွဲ့ဝင် UNA)

29/7/2016
သဘာပတိ ဖဒိုနော်စီဖိုးရာစိန်(ဒုဥက္ကဋ္ဌ KNU )
တွဲဘက်သဘာပတိ ၁ ဦးအောင်မြတ် (ဒုစစ်ဦးစီးချုပ် KNPP)
။ ၂ ဦးသံခဲ ( ဥက္ကဋ္ဌ ABSDF )

30/7/2016
သဘာပတိ ဒူဝါအင်ဘန်လ ( ဒုဥက္ကဋ္ဌ KIO )
တွဲဖက်သဘာပတိ
၁၊ နိုင်အောင်မင်း (အထွေထွေအတွင်းရေးမှူး NMSP)။
၂၊ ခွန်မြင့်ထွန်း( ဥက္ကဋ္ဌ PNLO) တို့ဖြစ်ကြသည်။

SSPP မှ ကိုယ်စားလည်အဖွဲ့ခေါင်းဆောင် စဝ်စိုင်းထူးမှာ ကျန်းမာရေးအခြေအနေကြောင့် သဘာပတိအဖွဲ့တွင် ပါဝင်ခဲ့ခြင်းမရှိခဲ့ပေ။

ညီလာခံလျာထားချက်

မိုင်ဂျာယာန်ညီလာခံအား ၂၀၁၆ ဇူလိုင် ၂၆ မှ ၂၉ ထိ ၄ ရက်လျာထားပြီး တရက်လျှင် အကြောင်းအရာတရပ် ဆွေးနွေး၍ ဘုံသဘောထားစုစည်းရန် ရည်ရွယ်ထားခဲ့သည်။ လျာထားချက်အရ ၄ ရက်အတွင်းဆွေးနွေးမည့်အကြောင်းအရာ ၄ ခုမှာ အောက်ပါအတိုင်း ဖြစ်သည်။

၁။ ပင်လုံလက်စွဲစာတမ်း
၂။ ဖက်ဒရယ်အခြေခံမူ
၃။ ဖက်ဒရယ်ပြည်ထောင်စု၏ကာကွယ်ရေးနှင့်လုံခြုံရေးမူဝါဒများ
ဖက်ဒရယ်ပြည်ထောင်စုတပ်မတော်ဆိုင်ရာမူဝါဒများ
၎။ နိုင်ငံရေးဆွေးနွေးမှုဆိုင်ရာ မူဘောင်သုံးသပ်ချက်

၎င်းတို့အား တရက်လျှင် အကြောင်းအရာတခုဆွေးနွေးရန်ရည်ရွယ်ချက်ထားရှိသော်လည်း ပြီးပြတ်ခြင်းမရှိသဖြင့် ဇူလိုင် ၃၀ ရက်နေ့တရက်တိုးမြှင့် ကျင်းပခဲ့သည်။

မိုင်ဂျာယာန်ညီလာခံတွင် ဆွေးနွေးမည့်အကြောင်းအရာများသည် များပြားကျယ်ပြန့်သဖြင့် သတ်မှတ်အချိန်အကန့်အသတ်အရ အပြီးအပြတ် ဆွေးနွေးရန်မလွယ်လှပေ။ သို့သော် ညီလာခံ စီစဉ်သူများအနေနှင့် အခြေခံကျသည့် ဘုံသဘောတူညီချက်များသာရယူရန် ရည်ရွယ်ပြီး ကျန်အချက်အလက်များကို ထည့်သွင်းစဉ်းစားထားရန်အတွက် လူထုအားအမှာစကားပါးလိုသည့် သဘောဖြစ်ပုံရသည်ဟု သုံးသပ်ရပေသည်။ ဤသို့အမှာစကားပါးခြင်းကြောင့် လူထုကြား စိတ်ဝင်စားသူများကြားတွင် အပြန်အလှန်ဆွေးနွေးအဖြေရှာကြရန်အတွက် စဉ်းစားကြရန်အတွက် ရည်ရွယ်ပုံရသည်။ သူတို့ရည်ရွယ်ချက် အောင်မြင်ပုံရသည်။

ဆက်လက်ဖော်ပြပါမည်

Mg Mg Soe (မောင်မောင်စိုး)