ဇင်လင်း - နှစ်ပေါင်း ၇၀ ပြည့်သည့်တိုင် ပင်လုံကတိ မတည်နိုင်တာ ဘာကြောင့်လဲ?
(မိုးမခ) ဖေဖော်ဝါရီ ၁၄၊ ၂၀၁၇
၁၉၄၇ ခုနှစ် ဖေဖေါ်ဝါရီလ(၁၂) ရက်နေ့တွင် ဗိုလ်ချုပ်အောင်ဆန်းနှင့်တကွ တိုင်းရင်းသားခေါင်းဆောင်ကြီးများသည် ဒီမိုကရေစီ ဖက်ဒရယ် ပြည်ထောင်စုတစ်ရပ် ထူထောင်နိုင်ရေးအတွက် ရှမ်းပြည်နယ် ပင်လုံမြို့၌တွေ့ဆုံ ဆွေးနွေး ညှိနှိုင်း ခဲ့ကြသည့် သမိုင်းကြောင်းကို မြန်မာပြည်သူလူထု သိရှိကြပြီးဖြစ်သည်။ ပင်လုံညီလာခံဆွေးနွေးပွဲ ရလဒ်အရ မြန်မာ တစ်နိုင်ငံလုံး ပြည်နယ်ပြည်မ မခွဲခြားဘဲ၊ နိုင်ငံရေး၊ အုပ်ချုပ်ရေး၊ စီးပွားရေး၊ ပညာရေး၊ ကျန်းမာရေး အစရှိသည့် ကဏ္ဍ အသီးသီးတွင် တန်းတူညီမျှခွင့်နှင့် ကိုယ်ပိုင်ပြဋ္ဌာန်းခွင့် အပါအ၀င် ဒီမိုကရေစီ ပိုင်ခွင့်များကို အပြည့်အ၀ အာမခံမည့် ပြည်ထောင်စုတစ်ခု ထူထောင်ရန် သဘောတူခဲ့ကြသည်။ ထို သဘောတူညီမှုအရ သမိုင်းဝင်ပင်လုံစာချုပ်ကို လက်မှတ် ရေးထိုးခဲ့ကြသည်မှာ ယခုဆိုလျှင် နှစ်ပေါင်း(၇၀) ပြည့်ခဲ့ပြီ။
၁၉၄၇ ဖေဖေါ်ဝါရီလ(၁၂) တွင် ပြုလုပ်ခဲ့သော ̏ ပင်လုံညီလာခံ သဘောတူညီချက်” ကို အခြေပြု၍၊ တိုင်းရင်းသား ခေါင်း ဆောင်ကြီးများ လွတ်လပ်ရေးကို အရယူခဲ့ကြသည်။ တစ်နည်းအားဖြင့် ̏ ပင်လုံစိတ်ဓါတ်˝ကို အခြေခံ၍ လွတ်လပ်ရေး ရယူခဲ့သည်ကို နှောင်းလူတို့ မမေ့အပ်ပေ။ ပင်လုံစာချုပ်၏ ရည်ရွယ်ချက်မှာ ပြည်ထောင်စုဖွား တိုင်းရင်းသား ပြည်သူ ခပ်သိမ်း လွတ်လပ်စွာ ယုံကြည်ခွင့်၊ လွတ်လပ်စွာ ကိုးကွယ်ခွင့်၊ လွတ်လပ်စွာ အသက်မွေးဝမ်းကျောင်းခွင့်၊ လွတ်လပ်စွာ တွေးတောကြံဆခွင့်၊ လွတ်လပ်စွာ ရေးသားပြောဆိုခွင့်၊ လွတ်လပ်စွာ စည်းရုံးခွင့်၊ လွတ်လပ်စွာ စည်းဝေးခွင့်၊ တရားမဲ့ ဖမ်းဆီး ချုပ်နှောင်မှုများမှ ကင်းလွတ်ခွင့်၊ တန်းတူအခွင့်အရေး ရပိုင်ခွင့်၊ တန်းတူ အလုပ် လုပ်ပိုင်ခွင့်၊ တရားဥပဒေ၏ အကာအကွယ်ပေးမှုကို တပြေးညီရပိုင်ခွင့် အစရှိသော ဒီမိုကရေစီရပိုင်ခွင့်များကို တန်းတူညီမျှ ခံစားနိုင်ကြရန်ဖြစ်သည်။
ပင်လုံသဘောတူစာချုပ်အကြောင်း ပြောကြသည့်အခါ နယ်ချဲ့အင်္ဂလိပ်တို့ကပင် လေးစား အသိအမှတ်ပြုခဲ့ကြရသည့် အချက်ကို ယနေ့ မြန်မာ့နိုင်ငံရေး ခေါင်းဆောင်များ သတိပြုကြရမည်ဖြစ်သည်။ ထိုစဉ်က တိုင်းရင်းသားခေါင်းဆောင်များ သာ လက်မှတ်မထိုးခဲ့လျှင် တောင်ပေါ်နှင့် မြေပြန့် နှစ်ပိုင်း ကွဲသွားနိုင်ဖွယ်ရာ ဖြစ်သည်။ တောင်တန်းနှင့် ပြည်မ ပင်လုံ စာချုပ်အရ ပူးပေါင်း၍ လွတ်လပ်ရေး ရယူခြင်းသည် တိုင်းရင်းသားများ၏ ဆန္ဒသဘောထား အစစ်အမှန် ဟုတ် မဟုတ် ဗြိတိသျှအစိုးရက စုံစမ်းရေးကော်မရှင်ဖွဲ့ကာ စုံစမ်းခဲ့ရသည့် အခြေအနေအထိ ရောက်ခဲ့ရသည်။ ပင်လုံစာချုပ်ကို ဗြိတိသျှ တို့က လွယ်လွယ်လက်ခံခဲ့သည် မဟုတ်။ မြန်မာသမိုင်းကို ပြန်လည်လေ့လာပါက “ရီးစ်ဝီလျံကော်မရှင်” (Rees-Williams Commission) ဆိုသည်ကို တွေ့နိုင်ကြသည်။ ၎င်း ကော်မရှင်က ဗမာများနှင့် အတူ လွတ်လပ်ရေး ရယူလိုခြင်းသည် တိုင်းရင်းသားများ၏ ဆန္ဒသဘောထားအမှန် ဟုတ် မဟုတ် စုံစမ်းရသည့် အဖွဲ့ဖြစ်သည်။ ကော်မရှင် ဥက္ကဋ္ဌမှာ ထိုစဉ်က ဗြိတိသျှလေဘာပါတီ ပါလီမန်အမတ် Lt.Col.David Rees-Williams ဖြစ်သည်။ သူ့နာမည် ကို အစွဲပြုကာ သမိုင်းတွင် “ရီးစ်ဝီလျံကော်မရှင်” ဟု ခေါ်ဆိုခဲ့ခြင်း ဖြစ်သည်။
၁၉၄၇ ခုနှစ် မတ်လ(၇)ရက်နေ့တွင် ရီးစ်ဝီလျံ ကော်မရှင် မြန်မာပြည်ကို ရောက်ရှိသည်။ ကော်မရှင်အဖွဲ့တွင် အင်္ဂလိပ် အရာရှိများအပြင် မြန်မာတို့ဘက်မှ ဗိုလ်ခင်မောင်ကလေး၊ ဦးတင်ထွဋ်၊ သခင်နုတို့ပါဝင်ပြီး၊ တိုင်းရင်းသားများ ဘက်က ကိုယ်စားလှယ် အဖြစ် စောစံကေး၊ စောမြင့်သိန်း၊ မိုင်းပွန်စော်ဘွား စ၀်စံထွန်း၊ ဆမားဒူးဝါး ဆင်ဝါးနောင်၊ ဦးဝမ်ကိုဟော တို့ပါဝင်ကြသည်။ ကော်မရှင်၏ အချိုးအစားကို မျှမျှတတဖြစ်စေရန် ဗြိတိသျှအစိုးရက ဖွဲ့ပေးခဲ့ပုံကို အတုယူသင့်ပေ သည်။ ကော်မရှင်၏ တရားဝင်အမည်မှာ Frontier Areas Committee of Inquiry ဖြစ်သည်။ ကော်မရှင်အဖွဲ့သည် ကချင်၊ကယား၊ ကရင်၊ ချင်း၊ ရခိုင် နှင့် ရှမ်းပြည်နယ်များအတွင်း မိုင်ပေါင်း (၂၀၀၀) ခန့်ခရီးဆန့်၍၊ တိုင်းရင်းသား အဖွဲ့အစည်းပေါင်းစုံ၊ လူပုဂ္ဂိုလ် ပေါင်းစုံနှင့် တွေ့ဆုံမေးမြန်းစုံစမ်းခဲ့သည်။ ၁၉၄၇ ဧပြီ(၂၃)တွင် အစီရင်ခံစာထွက်ခဲ့သည်။ ဗမာများနှင့်အတူ ပူးတွဲ၍ လွတ်လပ်ရေး ရယူခြင်းသည် တိုင်းရင်းသားများ၏ ဆန္ဒ သဘောထားအမှန်ဖြစ်သည်ဟု ကော်မရှင်က အစီရင်ခံ တင်ပြခဲ့သည်။ ၁၉၄၇ မေလ (၂) ရက်နေ့၌ ဗြိတိသျှအစိုးရက အစီရင်ခံစာကို အတည်ပြုခဲ့သည်။ ဆိုလိုသည်မှာ “ရီးစ်ဝီလျံကော်မရှင်” အစီရင်ခံချက်အရ ဗြိတိသျှအစိုးရကလည်း ပင်လုံစာချုပ်ကို အသိအမှတ်ပြုခဲ့ကြောင်း သမိုင်းတွင် တွေ့နိုင်သည်။ သို့ဖြစ်သောကြောင့် ပင်လုံစာချုပ်ပါ ကတိက၀တ်များနှင့် ပတ်သက်၍ သက်ဆိုင်ရာ အစိုးရပိုင်းမှ တာဝန်ရှိသူတို့အနေဖြင့် ပေါ့ပေါ့တန်တန် သဘောမထားသင့်ဟု ယူဆပါသည်။
သို့သော်လည်း သမိုင်းဝင် ပင်လုံစာချုပ်တွင် သဘောတူညီထားခဲ့သော တိုင်းရင်းသားဒေသ “ကိုယ်ပိုင်အုပ်ချုပ်ခွင့်” ကို ယနေ့အချိန်အထိ အကောင်အထည် မပေါ်သေးကြောင်း ၀မ်းနည်းဖွယ်ရာတွေ့ရသည်။ ပင်လုံ အနှစ်သာရ သဘောကို အစိုးရအဆက်ဆက် အသိအမှတ် မပြုရုံမက၊ သမိုင်းစာမျက်နှာပေါ်မှ ပျောက်ကွယ်သွားစေရန် နည်းမျိုးစုံနှင့် လုပ်ခဲ့ကြ သည်။ နောင်လာ နောက်သား မျိုးဆက်သစ်များထံ ̏ ပင်လုံစိတ်ဓါတ်˝ ကူးစက်သက်ဝင်မှု မရှိအောင် လုပ်နေခြင်းလားဟု ထင်မြင်ဖွယ်ရာ ဖြစ်သည်။ ပင်လုံ သဘောတူညီချက်ကို အကောင်အထည်မဖေါ်နိုင်ခဲ့သဖြင့် ယနေ့ထိ ပြည်တွင်းစစ်မီး မငြိမ်းနိုင်ပဲ၊ ဒေသအတွင်း ဖွံ့ဖြိုးမှုအနိမ့်ဆုံး နိုင်ငံ ဖြစ်နေခဲ့ရသည်ကို သတိမူသင့်သည်။
မကြာသေးမီက ထိုင်းနိုင်ငံ ချင်းမိုင်မြို့၌ ဇန်နဝါရီ ၂၃ ရက်မှ ၂၅ ရက်အထိ UNFC ဗဟိုအလုပ်အမှုဆောင် ကော်မတီ အရေးပေါ် အစည်းအဝေးတစ်ရပ်ကို ကျင်းပခဲ့ပြီး လက်ရှိ မြန်မာပြည် ငြိမ်းချမ်းရေးတည်ဆောက်မှုနှင့်နိုင်ငံရေးဆွေးနွေးမှု ဖြစ်စဉ်တို့ အပါအဝင် ရှေ့ လုပ်ငန်းစဉ်များနှင့် ပတ်သက်၍ ဆွေးနွေးခဲ့ကြကြောင်း မွန်သတင်းအေဂျင်စီ၏ ဇန်နဝါရီ ၃၀ ရက်နေ့ သတင်းတွင် ဖေါ်ပြခဲ့သည်။ ၎င်း သတင်းတွင် တပ်မတော်အနေဖြင့် အကြမ်းဖက်အဖွဲ့များအဖြစ် တရားဝင် ခေါ်ဝေါ်သုံးစွဲကာ အကြောင်းအမျိုးမျိုးပြ၍ ထိုးစစ်များ ပိုမို ဆင်နွှဲနေခြင်းမှာ တွေ့ဆုံဆွေးနွေးရေးဖြစ်စဉ်ကို ပျက်ပြားစေရန် ရည်ရွယ်ချက်ရှိရှိ လုပ်ဆောင်နေခြင်းဖြစ်သည်ဟု ညီညွတ်သောတိုင်းရင်းသားလူမျိုးများဖယ်ဒရယ်ကောင်စီ (UNFC) က ဇန်နဝါရီ ၂၇ ရက်နေ့စွဲဖြင့် ကြေညာချက် ထုတ်ပြန်ခဲ့ကြောင်း ဖေါ်ပြထားသည်။
“ကျွန်တော်တို့ နိုင်ငံရေးအရ တွေ့ဆုံ ဆွေးနွေးသွားဖို့ စဉ်းစားထားပါတယ်။ဒါပေမယ့် တပ်မတော်က KIA အပါအ အဝင်TNLA ရယ်၊ MNDAA ရယ်ကို အကြမ်းဖက်လို့ သတ်မှတ်နေတဲ့အတွက် ပြည်တွင်းမှာ ဆွေးနွေးပွဲသွားဖို့ အခက် အခဲရှိနေတယ်။ကျွန်တော်တို့ ဆီက ကိုယ်စားလှယ်တွေကို လုံခြုံရေးအာမခံရမှ သွားနိုင်မယ်။ဒါက နိုင်ငံရေးနည်းအရပဲ ဖြေရှင်းနိုင်မယ်” ဟု UNFC ဒုဥက္ကဌ နိုင်ဟံသာ က မွန်သတင်းအေဂျင်စီအား ပြောသည်။
အဆိုပါ ထုတ်ပြန်ချက်တွင် ၂၀၁၆ ခုနှစ်၊ ဒီဇင်ဘာလတွင် ပြည်သူ့လွှတ်တော်အတွင်း KIA၊ TNLA၊ MNDAA၊ အဖွဲ့အစည်း တို့ကို အကြမ်းဖက်အဖွဲ့အစည်းများအဖြစ် သတ်မှတ်ရန် မဲခွဲဆုံးဖြတ်ရာ၌ အတည်မပြုနိုင်ခဲ့သည့် အဆိုအား ရှမ်းပြည်နယ် လွှတ်တော်သို့ တပ်မတော်ကိုယ်စားလှယ်များမှ ဆက်လက်တင်သွင်းပြီး မဖြစ်မနေ အတည်ပြုသွားခဲ့ကြောင်း၊ ထို အတည်ပြုချက်အရ အဆိုပါ အဖွဲ့အစည်းများကို အကြမ်းဖက်အဖွဲ့များအဖြစ် မြန်မာ့တပ်မတော်က တရားဝင် ခေါ်ဝေါ်သုံးစွဲ ကာ အကြောင်းအမျိုးမျိုးပြပြီး ပိုမိုထိုးစစ်ဆင်နေခြင်းမှာ တွေ့ဆုံ ဆွေးနွေးရေးဖြစ်စဉ်ကို ပျက်ပြားသွားစေရန် ရည်ရွယ်ချက် ရှိရှိ လုပ်ဆောင်နေခြင်းဖြစ်သည်ဟု UNFC က ဆိုထားသည်။ ထို့အပြင် လူထုအကြားစိတ်ဝမ်းကွဲပြားမှု ပိုမိုတိုးပွားစေသည့် လုပ်ဆောင်ချက်များနှင့် တွေ့ဆုံဆွေးနွေးရေးဖြစ်စဉ်ကို ပျက်ပြားစေရန် အစီအစဉ်ရှိရှိဖော်ဆောင်နေသည့် အကြမ်းဖက် အဖွဲ့အစည်းအဖြစ် သတ်မှတ်လုပ်ဆောင်မှုများအားလုံးကို ပြင်းထန်စွာ ကန့်ကွက်ရှုတ်ချသည်ဟု UNFC ကဆိုသည်။
၎င်းအပြင် ရခိုင်ပြည်အမျိုးသားကောင်စီ ANC မှ ဖေဖေါ်ဝါရီ ၂ ရက်နေ့က ကြေညာချက်တစ်စောင် ထုတ်ပြန်ခဲ့ပြီး အမျိုးသားဒီမိုကရေစီ အဖွဲ့ချုပ် (NLD) ၏ ဥပဒေရေးရာအကြံပေးနှင့် တရားရုံးချုပ်ရှေ့နေတစ်ဦးဖြစ်သော ဦးကိုနီ လုပ်ကြံ သတ်ဖြတ်ခံရခြင်း၏ နောက်ကွယ်တွင် အမျိုးသားဒီမိုကရေစီအဖွဲ့ချုပ်၏ ရွေးကောက်ပွဲ ကတိကဝတ်များကို ပျက်စီးစေလို သော၊ ဒီမိုကရေစီပြုပြင် ပြောင်းလဲရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်ကို အာမခံသော ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးကို လက်မခံလိုသော ၊ ဘာသာရေး၊ လူမျိုးရေးအဓိကရုဏ်းဖြင့် နိုင်ငံရေးအာရုံ လွှဲကာ နိုင်ငံတော်၏ ငြိမ်းချမ်းရေးနှင့် ဖွံ့ဖြိုးရေးကို မလိုလားသော၊ ခါးပိုက်ဆောင်တပ်၊ လူမိုက်ဂိုဏ်းများ (Proxy Mafia) ဖြင့် လူထုအတွင်း အကြောက်တရားလွှမ်းမိုးစေလျှက် နိုင်ငံ့အာဏာကို တရားမဝင် လက်ဝယ် ထိန်းသိမ်း ထားလိုသော အင်အားစုများ ပါဝင်နေမည်ဟု ယုံကြည်ကြောင်း ဖေဖေါ်ဝါရီ ၃ ရက်နေ့ မဇ္ဈိမသတင်းတွင် ဖော်ပြထားသည်။
“ ဦးကိုနီဟာ ကျွန်တော်တို့တိုင်းပြည် အပြောင်းအလဲထဲမှာ ဖွဲ့စည်းပုံပြောင်းလဲနိုင်ဖို့ ထဲထဲဝင်ဝင် အဓိက ပါဝင် ပတ်သက် နေသူတစ်ဦးလည်း ဖြစ်ပါတယ်။ အောက်ခြေအဆင့်ကနေ နိုင်ငံတော်အဆင့်အထိ ဥပဒေရေးရာအရ အကြံပေး၊ ပညာပေး နေသူလည်း ဖြစ်ပါတယ်။ ဒီလိုပဲ ကျွန်တော်တို့ UNFC တပ်ပေါင်းစုက တောင်းဆိုမှုတွေနဲ့ ပတ်သက်ပြီးတော့လည်း သူက ထပ်တူထပ်မျှ ဖြစ်တယ်။ သူ ဆုံးရှုံးသွားတာဟာ အားလုံးအတွက် နစ်နာမှုတစ်ရပ်ပါ။ ဒါ့အပြင် ဖွဲ့စည်းပုံပြင်ဆင်ရေးနဲ့ ပတ်သက်ပြီးတော့လည်း သွယ်ဝိုက်သောအားဖြင့် ခြိမ်းခြောက်ခံလိုက်ရတာလည်း ဖြစ်ပါတယ် ” ဟု UNFC တပ်ပေါင်းစု၏ တွဲဘက်အတွင်းရေးမှူး (၁)၊ ရခိုင်ပြည်အမျိုးသားကောင်စီ ANC ၏ အထွေထွေအတွင်းရေးမှူး ဖြစ်သူ ဦးထွန်းဇော်က ပြောကြောင်း မဇ္ဈိမသတင်းတွင် ဖော်ပြသည်။
ကချင်ပြည်နယ်အတွင်း အစိုးရတပ်မတော်က အပြင်းအထန်ထိုးစစ်ဆင် တိုက်ခိုက်နေခြင်းသည်လည်း နိုင်ငံရေး ပြဿ နာကို နိုင်ငံရေးနည်းလမ်းဖြင့် မဖြေရှင်းလိုသည့် သဘောထားဖြစ်၍၊ ငြိမ်းချမ်းရေးကို ဖျက်လိုဖျက်ဆီး လုပ်နေခြင်း ဖြစ်ကြောင်း ကချင်လွတ်မြောက်ရေးအဖွဲ့ KIO က ၂၀၁၆ အောက်တိုဘာ ၈ ရက်နေ့က သဘောထားကြေညာချက် ထုတ်ပြန်ခဲ့ဖူးသည်။ တပ်မတော်ဘက်က ထိုးစစ်ဆင်တိုက်ခိုက်မူများ မရပ်တန့်ပါက၊ ပြည်တွင်းစစ်မီး ပိုမိုကျယ်ပြန့်စေနိုင် သောကြောင့် ဖြစ်လာမည့် ဆိုးကျိုးများကို တပ်မတော်က တာဝန်ခံရမှာဖြစ်ကြောင်း KIO ပြန်ကြားတာဝန်ခံ ဒုတိယ ဗိုလ်မှူးကြီး နော်ဘူ က လွတ်လပ်တဲ့အာရှအသံ RFA သတင်းသို့ ပြောခဲ့သည်။ ကေအိုင်အေ ဌာနချုပ် လိုင်ဇာအနီးရှိ အင်ခရမ် တောင်ကုန်းစခန်းနှင့် ဂီဒွန် စခန်းတို့ကို ပြီးခဲ့သည့် အောက်တိုဘာလ ၄ ရက်နေ့က တပ်မတော်ဘက်က လေယာဉ် ၄ စင်းဖြင့် ဗုံးကြဲတိုက်ခိုက်ခဲ့သည်။ ငြိမ်းချမ်းရေးညီလာခံကို အောင်မြင်စေလိုပါက အစိုးရတပ်မတော်အနေဖြင့် ထိုသို့သော တိုက်ခိုက်မှုများ မလုပ်သင့်ဟု ဝေဖန်မှုများလည်းရှိခဲ့သည်။ တိုင်းရင်းသား ပြဿနာများကို စစ်ရေးအရ ဖြေရှင်းလျှင် မည်သည့်နည်းနှင့်မျှ အဖြေ မထွက်နိုင်ဟု စစ်ရေးအကဲခတ်များက သုံးသပ်ကြသည်။
ဖေဖော်ဝါရီ ၆ ရက်နေ့ နံနက်က ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) အစည်းအဝေးကို နေပြည်တော်ရှိ သင်္ဂဟဟိုတယ်၌ ကျင်းပရာ UPDJC ဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက်အမှာစကား ပြောကြားခဲ့ကြောင်း နိုင်ငံတော်၏ အတိုင်ပင်ခံရုံး သတင်းထုတ်ပြန်ချက်များအရ သိရှိရသည်။
UPDJC ဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ်က “မိမိတို့နိုင်ငံ တစ်နိုင်ငံလုံး ပြန်လည်သင့်မြတ်ရေးဆိုသည်မှာ မတူ ကွဲပြားသည့် သဘောထားများကို သင့်မြတ်စေရန်လိုကြောင်း၊ မတူကွဲပြားသည့် သဘောထားဆိုသည်မှာ လက်နက်ကိုင် အဖွဲ့အစည်းများနှင့် အစိုးရ အကြားတွင်သာ ပြဿနာရှိခြင်းမဟုတ်ကြောင်း၊ မတူကွဲပြားသည့် သဘောထားများဆိုသည် မှာ မိမိတို့ နိုင်ငံတစ်ဝန်းတွင် ပုံစံအမျိုးမျိုးနှင့် ရှိကြောင်း၊ နိုင်ငံရေးအရ မတူကွဲပြားသည့် သဘောထားများ၊ တိုင်းရင်းသား များအရေးအရ မတူကွဲပြားသည့် သဘောထားများ၊ ဘာသာရေးအရ မတူကွဲပြားသည့် သဘောထားများ၊ လူမှုရေးအရ မတူကွဲပြားသည့် သဘောထားများဆိုသည့် မတူကွဲပြားသည့်သဘောထား အမျိုးမျိုး ရှိကြောင်း၊ အမှန်တကယ် မိမိတို့ ဒီမိုကရေစီကို လိုလားလျှင် မတူကွဲပြားသည့်သဘောထားများကို ငြိမ်းချမ်းသည့်နည်းဖြင့် ဖြေရှင်းနိုင်သည်ကို ယုံကြည်ရန် လိုကြောင်း၊ မိမိတို့အနေဖြင့် ယခုလို ပြောရခြင်းမှာ စကားသက်သက်အရ ပြောခြင်းမဟုတ်ကြောင်း၊ အလုပ်နှင့် သက်သေထူခဲ့ပြီးဖြစ်ကြောင်း၊ နှစ် ၃၀ နီးပါး ဒီမိုကရေစီ အတွက် လှုပ်ရှားခဲ့သည့် အချိန်တွင် မိမိတို့ ဆွေးနွေးတိုင်ပင်ပြီး အချင်းချင်းအကြား မတူကွဲပြားသည့် ပြဿနာများကို ဖြေရှင်းနိုင်မည် ဆိုသည့် ယုံကြည်ချက်ဖြင့် မိမိတို့ ရပ်တည်ခဲ့ခြင်းဖြစ် ကြောင်း၊ ယင်းယုံကြည်ချက်မှ လုံးဝမသွေဖည်ခဲ့ကြောင်း၊ တစိုက်မတ်မတ်ဆွေးနွေးပွဲကိုသာ တောင်းဆိုခဲ့ကြောင်း။” စသဖြင့် ရှင်းလင်းပြောဆိုခဲ့သည်။
“အခုကျွန်မတို့ရဲ့ ပြည်ထောင်စုကြီးကို တကယ်ပဲ ငြိမ်းချမ်းစေချင်တယ်ဆိုရင် ငြိမ်းချမ်းရေးကို ဘာဖြစ်လို့လိုချင်တာလဲ။ ငြိမ်းချမ်းရေး လိုချင်တယ်ဆိုတာ ကျွန်မတို့ရဲ့ နိုင်ငံသူ နိုင်ငံသားတွေ စိတ်လုံခြုံဖို့ပဲ။ စိတ်လုံခြုံမှုမရှိဘဲနဲ့ ဘယ်တော့မှ စိတ်ချမ်းသာမှုရမှာ မဟုတ်ပါဘူး။ စိတ်မလုံခြုံဘဲနဲ့ စိတ်ချမ်းသာပါတယ်ဆိုတာ ဒါမဖြစ်နိုင်တဲ့ကိစ္စပါ။ ကျွန်မတို့ ငြိမ်းချမ်းရေး လိုချင်တယ်ဆိုတာဟာ ကျွန်မတို့ နိုင်ငံသူနိုင်ငံသားများ စိတ်လုံခြုံဖို့အတွက် ဖြစ်ပါတယ်။ စိတ်လုံခြုံဖို့ဆိုတာဟာ ငြိမ်းချမ်းရေးလည်း လိုအပ်တယ်။ တိုးတက်ရေးလည်း လိုအပ်တယ်။ ဘာဖြစ်လို့လဲဆိုတော့ စိတ်လုံခြုံပြီးတော့ ကိုယ့်မှာ မလောက်မင ဖြစ်နေတယ်ဆိုရင် စိတ်ချမ်းသာမှု တကယ့်လုံခြုံမှုဆိုတာ မဖြစ်နိုင်ပါဘူး။” ဟု ဒေါ်အောင်ဆန်းစုကြည်က ပြောကြားကြောင်း အလဲဗင်းမီဒီယာသတင်း၌ တွေ့ရသည်။
ဤနေရာတွင် အလျဉ်းသင့်သဖြင့် ရှမ်းပြည်နယ် ပင်လုံမြို့၌ ဖေဖေါ်ဝါရီ ၁၂ ရက်နေ့တွင် ကျင်းပခဲ့သည့် နှစ် (၇၀) မြောက် ပြည်ထောင်စုနေ့ အခမ်းအနားတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ပြောကြားသည့် မိန့်ခွန်း ကောက်နှုတ်ချက်ကို ဖေါ်ပြလိုသည်။
“သမိုင်းဆိုတာဟာ ဘယ်တော့မှရပ်မနေပါဘူး။ ဆက်ပြီးတော့ လှုပ်ရှားသွား တာဖြစ်ပါတယ်။ ဒီတော့ ကျွန်မတို့ရဲ့ လွတ်လပ်ရေးခေါင်းဆောင်ကြီးများဟာ ပင်လုံ သမိုင်းကို စတင်ပြီးတော့ ထူထောင်ခဲ့တယ်၊ ဒီသမိုင်းဟာ အောင်အောင်မြင်မြင်နဲ့ နိဂုံးချုပ်ဖို့အတွက် တာဝန်ကတော့ ကျွန်မတို့အပေါ်မှာ ကျရောက်လာပြီဖြစ်ပါတယ်။
သမိုင်းကနေ ဘယ်သူမှမလွတ်မြောက်နိုင်ပါဘူး။ ခေတ်အဆက်ဆက် ကမ္ဘာ တည်သရွေ့ ကျွန်မတို့ရဲ့ လုပ်ရပ်တွေကို မျိုးဆက်တွေတစ်ဆက်ပြီးတစ်ဆက်က သုံးသပ်ပြီး စီရင်ချက်ချသွားမှာဖြစ်ပါတယ်။ ဒီလိုစီရင်ချက်ချမယ့် ပြည်သူလူထုရဲ့ ခုံရုံးရှေ့မှာ အခုလက်ရှိ မျိုးဆက်တွေမဟုတ်ဘဲနဲ့ နောင်လာမယ့် မျိုးဆက်အဆက် ဆက်ရဲ့ ခုံရုံးတွေရှေ့မှာ ဘယ်လောက်အထိ မားမားမတ်မတ်ရပ်တည်ပြီးတော့ လက်ခံ နိုင်မလဲ၊ ကျွန်မတို့ဟာ ဒီခုံရုံးတွေရဲ့ဘယ်လိုဆုံးဖြတ်ချက်တွေကို ရင်ဆိုင်ရမလဲဆိုတာ အခုအချိန်မှာ လေးလေးနက်နက်စဉ်းစားဖို့ ရသွားပါပြီ။
တိုင်းရေးပြည်ရေးနဲ့ပတ်သက်လို့ အင်မတန်မှ ကျွမ်းကျင်ခဲ့တဲ့ပုဂ္ဂိုလ်ကြီး၊ ကဗျာ ဆရာကြီးတစ်ဦးရဲ့ ရေးသားချက်တွေကို ကျွန်မတို့ ပြည်သူအများ သိကြမှာဖြစ်ပါတယ်။
"စစ်နည်းဗျူဟာ ဘယ်လိုကြွယ်လည်း၊ စွဲကိုင်လက်နက် ဘယ်လိုထက်လည်း ပြည်သူ့နှလုံး မသိမ်းကျူံးလျှင်၊ ပြည်သူ့စွမ်းအား မကိုးစားလျှင်၊ ဓားသွားလည်း ကြွေအံ့၊ လှံလည်းခွေအံ့"….တဲ့။
ကျွန်မတို့ရဲ့ အဓိကအင်အားဟာ ပြည်သူရဲ့နှလုံးများနဲ့ ပြည်သူရဲ့စွမ်းအား ဖြစ်ပါတယ်။ ငြိမ်းချမ်းရေး ရယူဖို့ကြိုးစားတဲ့အခါ မှာ ဒီအဓိကအင်အားတွေကို ရယူဖို့ဖြစ်ပါတယ်။ ပြည်သူလူထုရဲ့ နှလုံးသားတွေ ကို သိမ်းကျုံးဖို့ဆိုတာ ပြည်သူ့အတွက် ရေရှည်အကျိုး၊ အခုလက်ရှိ ပစ္စုပ္ပန်တင်သာမကဘဲ နောင်လာမယ့် အဆက်ဆက်သော ကျွန်မတို့ မျိုးဆက်တွေရဲ့ အကျိုး အတွက် ကျွန်မတို့ ဘယ်လောက် စွန့်စားရဲတယ်၊ ဘယ်လောက်ခံရဲတယ်ဆိုတာ အဓိကကျွန်မတို့အပေါ်မှာ ကျရောက်မယ့် တာဝန်ဖြစ် ပါတယ်။
ပြည်သူလူထုဟာ မိမိတို့အတွက် ဘယ်သူတွေက အစစ်အမှန် စွန့်စားတယ်၊ စွန့်လွှတ်တယ်ဆိုတာကို ကောင်းကောင်းသိပါ တယ်။ ဆိုရိုးစကားရှိပါတယ်။ အများကို တစ်ခဏ လှည့်ဖြားလို့ရပါလိမ့်မယ်၊ အားလုံးကို ထာဝရတော့ ဘယ်တော့မှ လှည့်ဖြားလို့ မရပါဘူး။
ပြည်သူဟာ မိမိတို့ရဲ့အကျိုးအတွက် ဘယ်သူတွေ ဆောင်ရွက်ရမလဲဆိုတာကို ကောင်းစွာသိပါတယ်။ ပြည်သူတွေအတွက် တန်ဖိုးအရှိဆုံး၊ အကြီးမားဆုံးအကျိုးကတော့ ငြိမ်းချမ်းရေးပါပဲ။ ငြိမ်းချမ်းရေး မရှိဘဲနဲ့ ကျွန်မတို့နိုင်ငံဟာ ဖွံ့ဖြိုးတိုး တက်ရေးဆိုတာ မရှိနိုင်ပါဘူး။ ဒါကြောင့် ကျွန်မ ပြည်ထောင်စုနေ့မှာ ငြိမ်းချမ်းရေးနဲ့ ပတ်သက်လို့ ပါဝင်နေတဲ့ အစုအဖွဲ့ အားလုံးကို မေတ္တာ ရပ်ခံချင်ပါတယ်။
သတ္တိရှိရှိနဲ့ပြည်သူ့အကျိုးအတွက် စွန့်စားပါ၊ စွန့်လွှတ်ပါ၊ စွန့်စားခြင်း၊ စွန့်လွှတ်ခြင်း ဆိုတာ အမြင့်မားဆုံးသတ္တိဖြစ်ပါ တယ်။” … ဟု ဒေါ်အောင်ဆန်းစုကြည်က ပြောကြားခဲ့သည်။
ပေါင်းရုံးသုံးသပ်မည်ဆိုပါက ဒေါ်အောင်ဆန်းစုကြည်၏ ငြိမ်းချမ်းရေး မူဝါဒ လမ်းစဉ်သည် လက်တွေ့ကျ၍ ဘက်ပေါင်းစုံ ရှုထောင့်စုံမှ လေ့လာပြင်ဆင်ထားကြောင်း တွေ့ရသည်။ ရှုမြင်တွေးဆပုံများမှာလည်း “ပြည်ထောင်စုငြိမ်းချမ်းရေး၊ ပြည်ထောင်စုတိုးတက်ရေး၊ ပြည်ထောင်စု ညီညွတ်ရေး” မူဝါဒကို အခြေခံထားကြောင်းတွေ့ရသည်။ ထို့ကြောင့် ဖေဖေါ်ဝါရီ ၂၈ တွင် ကျင်းပတော့မည့် ၂၁ ရာစု ပင်လုံညီလာခံသို့ တိုင်းရင်းသားကိုယ်စားလှယ်စုံစုံညီညီ ပါဝင်နိုင်မည့် အခြေအနေကောင်းတရပ် ပေါ်ထွန်းလာရေးအတွက် အစိုးရနှင့် တပ်မတော်ဘက်က ကြိုတင်စည်းကမ်းသတ်မှတ်ချက် အချို့ကို ညှိနှိုင်းဖြေလျော့သင့်သည်။ စစ်ဆင်ရေးများကိုလည်း အချိန်အကန့်အသတ်ဖြင့်ဖြစ်စေ ရပ်စဲထားသင့်သည်။ ငြိမ်းချမ်းရေးစကားဝိုင်း ပြောဆိုဆွေးနွေးနေချိန်တွင် တပ်မတော်က ထိုးစစ်များဆက်လုပ်နေပါက အပြောနှင့် အလုပ် ဆန့်ကျင်ရာကျနေမည့် အချက်ကို တပ်မတော်ခေါင်းဆောင်းများ စဉ်းစားဆင်ခြင်သင့်သည်။
အကောင်းဆုံးနည်းလမ်းမှာ ‘၂၁ ရာစုပင်လုံ ငြိမ်းချမ်းရေး ညီလာခံ အောင်မြင်ရေး’ အတွက် တိုင်းရင်းသားခေါင်းဆောင်အားလုံး ပါဝင်လာစေရန် လမ်းခင်းပေးဖို့လိုသည်။ လက်တွဲခေါ်ယူဖို့လိုသည်။ လူမျိုးရေး တန်းတူညီမျှခွင့်ရှိရေး၊ နိုင်ငံရေး တန်းတူညီမျှခွင့် ရှိရေး၊ ကိုယ်ပိုင်ပြဌာန်းခွင့် အပြည့်အဝရှိရေးတို့ကို အာမခံသည့် ပင်လုံကတိကို ဖေါ်ဆောင်လိုပါက တိုင်းရင်းသား ခေါင်းဆောင် အားလုံး အနေဖြင့်လည်း ‘၂၁ ရာစုပင်လုံ ငြိမ်းချမ်းရေး ညီလာခံ အောင်မြင်ရေး’ အတွက် သတ္တိရှိရှိ ယုံကြည်ချက်ရှိရှိ အထူးအားစိုက်၍ NLD အစိုးရနှင့် လက်တွဲကြိုးပမ်းသင့်သည်။ သမိုင်းတွင် ကြုံတောင့်ကြုံခဲ ပြန်ပေါ်လာသည့် ငြိမ်းချမ်းရေးမျှော်လင့်ချက် အခွင့်အခါကောင်းတစ်ရပ်ကို လက်မလွှတ်သင့်ကြောင်း တိုက်တွန်းနှိုးဆော်အပ်ပါသည်။