သိင်္ဂီဝင်းတင် ● ဝင်ကြေးယူပြပွဲယဉ်ကျေးမှုကို အနုပညာအဖွဲ့တစ်ခု ပျိုးထောင်
(မိုးမခ) ဇန်နဝါရီ ၂၇၊ ၂၀၁၇
အနုပညာသမားတို့က ၎င်းတို့၏ပြပွဲများကို အခမဲ့ပြသတတ်ကြသော်လည်း ဇန်နဝါရီ ၂၇ ရက်နေ့က ရန်ကုန်တွင် ပြုလုပ်သည့် ၃ ရက်ကြာ ပြပွဲတစ်ခုကမူ ဝင်ကြေးပေးပြီး ဝင်ရောက် ကြည့်ရှုကြစေရန် စီစဉ်ထားကြောင်း တွေ့ရသည်။
ဒဂုံမြို့နယ်၊ ယောမင်းကြီးလမ်းတွင် ပြုလုပ်သည့် ၃ ရက်ကြာ အနုပညာပြပွဲကို Art+Plug အမည်ရှိ အနုပညာအဖွဲ့တစ်ခုက စီစဉ်ခြင်း ဖြစ်ပြီး အဖွဲ့၏ ပန်းချီ၊ ဓါတ်ပုံ၊ အသံပိုင်းဆိုင်ရာ အနုပညာလက်ရာများကို ပြသထားသည်။
ပြပွဲ ဝင်ကြေး ကျပ် ၅ဝဝ လက်ခံရခြင်းမှာ အနုပညာလက်ရာကို အားပေးတဲ့ အလေ့အကျင့် ရရေးအတွက် ရည်ရွယ်သည်ဟု အဖွဲ့ဝင် တစ်ဦးဖြစ်သူ ကိုဟန်ဆန်းက ပြောသည်။
"ကျွန်တော်တို့ ကောက်ခံတာက ပြန်ကုန်တဲ့ ကုန်ကျစရိတ်နဲ့တောင် မကာမိပါဘူး"ဟု ၄င်းက ဆက်ပြောသည်။
၂ဝ၁၃ ကတည်းက တစ်နှစ် တစ်ကြိမ် ကျင်းပသည့် ၎င်းတို့၏ ပြပွဲများကို ဝင်ကြေး သတ်မှတ် ကောက်ခံခဲ့သည်ဟု ဆိုသည်။
ပြပွဲသို့ ရောက်လာသော ပရိသတ်ထဲမှ အမျိုးသမီးတစ်ဦးက ဝင်ကြေးကောက်ခံခြင်းကို သဘောကျသည်ဟု ဆိုသည်။
"အနုပညာကို စိတ်ဝင်စားတဲ့ သူအတွက် ဒီဝင်ကြေးက ဘာမှမပြောပလောက်ဘူးလေ။ သူတို့ပြတဲ့ အနုပညာက အံမခန်းဘဲ။ စိတ်မဝင်စားသူတွေကတော့ ဝင်ကြေး မပေးရလည်း ကြည့်မှာ မဟုတ်ဘူး"ဟု ပြပွဲလာကြည့်သူ မသန္တာလှိုင်က ပြောသည်။
Art+Plug အဖွဲ့က တစ်နှစ်လုံးအားထုတ် ဖန်တီးထားသည့် အနုပညာလက်ရာတို့ကို စုစည်းပြသခြင်း ဖြစ်သည်။ အနုပညာပြပွဲများ ပုံမှန် ပြုလုပ်ပြီး ၅ နှစ်ကြာသောအခါ ၎င်းတို့၏ အတွေးအခေါ်၊ အယူအဆ၊ စိတ်ပိုင်း ရုပ်ပိုင်း ဖန်တီးထားသည့် အနုပညာဆိုင်ရာ ပြောင်းလဲလာမှုများ ရှိသောကြောင့် ယခု ပြပွဲကို အသွင်ပြောင်းလဲခြင်းဟု အမည်ပေးထားသည်။
ပြပွဲတွင် ဟန်ဆန်း၊ ဝဏ္ဏအောင်၊ မြင့်စိုးဦး ၊ မြင့်သူရ၊ သိုးထိန်းတို့၏ လက်ရာများ ပါဝင်သည်။
(သိင်္ဂီဝင်းတင်သည် Myanmar Now ၏ အလုပ်သင်သတင်းထောက်တစ်ဦး ဖြစ်သည်။)
